په کابل کې د ایرنا خبري آژانس د خبریال له مخي، د افغانستان د سرپرست حکومت د بهرنیو چارو د وزارت ویاند عبدالقهار بلخي نن پنجشنبه د تله ۱۹ مه په خپله ایکس پاڼه کې یوه خبرپاڼه خپره کړې او لیکلي یې دي: عبدالغفار «بحر» خپل باورليک کاپي د ازبکستان د بهرنیو چارو وزیر ښاغلي بختیار سعیدوف ته وسپارله.
بلخی زیاته کړې: سیدوف د افغانستان د اسلامي امارت د سفیر هرکلی وکړ او دا یې د ازبکستان او افغانستان د اړیکو د پراختیا په برخه کې یو مهم ګام وباله. هغه زیاته کړه: افغانستان او ازبکستان ګډې ګټې لري او په تېرو درېیو کلونو کې ښه اقتصادي پرمختګونه شوي او د دغه سفیر په راتګ سره به د دواړو هېوادونو اړیکې نورې هم پراخې شي.
بحر هم په ازبکستان کې د اسلامي امارت د رسمي سفیر او فوق العاده استازي په توګه د خپل کار په پیل کې خوښي څرګنده کړه او د دواړو هېوادونو د اړیکو لوړول یې یو مهم فصل وباله او د لا پیاوړتیا هیله یې څرګنده کړه.
نوموړي دغه راز له افغانستان سره د ازبکستان د نېک نیت ستاینه وکړه او ازبکستان یې د افغانستان ورور هېواد وباله.
هغه په افغانستان کې برابر شوی ثبات یو ښه فرصت وباله او زیاته یې کړه چې دا په افغانستان کې د پانګونې لپاره یو ښه فرصت دی، چې باید ترې ګټه واخیستل شي.
په خبرپاڼه کې ویل شوي چې د اسلامي امارت سفیر به د باورلیک اصلي کاپي د ازبکستان ولسمشر ښاغلي شوکت میرزایف ته وسپاري.
د ازبکستان د بهرنیو چارو وزیر په خپله پاڼه کې لیکلي: ما له عبدالغفار بحر سره چې په ازبکستان کې د افغانستان د ډیپلوماټیک ماموریت د مشر په توګه خپله دوره پیلوي، وکتل.
هغه ليکلي: زموږ هېوادونه د سوکالۍ په برخه کې ګډ تاريخ او ګډې ګټې لري چې په ټولو برخو کې د همکاريو د اړيکو د پراختيا لپاره د محرک په توګه کار کوي. په دوه اړخیزه، سیمه ییزه او نړیواله اجنډا کې مو پر مهمو مسایلو هم خبرې وکړې.
د ایرنا په وینا، مخکی له دی د چین ولسمشر په رسمي ډول د افغان سفیر باورلیک منلی و.
د پیغام پای/
Your Comment